في مرة من المرات و أنا قاعدة مع نفسي أتكلم مع الجماعة اللي جوة - جوايا أنا مش جوة حاجة تانية- لقيت واحد منهم بيقوللي:

بصي.. عادي جدا انك تبقى أنانية ..على العكس ده هيكون مفيد جدا سيكولوجيا . يعني انتي دلوقت أهم حاجة في العالم .. لأ انتي العالم بحالو و كمان قوته العظمى و معاكي حق الفيتو

أنا: ازاي يعني ؟

هو: يعني بما أنك بقيتي القوة العظمى فده معناه أنك انتي صاحبة القرار في كل حاجة.. أيوه آه هناخد رأي الكام ميت ربعميت ستميت دوله المجودين غيرنا .. بس في النهاية رأيك هو اللي يمشي، لو حد قال حاجة كانت في نظرك مفيدة - لكي انتي طبعا أو نبهك من غير قصد برأية لحاجة حلوة - برضه بالنسبالك- ممكن نمشيله رأيه...... غير كدة الستميت دوله دول يرحوا يخبطوا راسهم في أجدعها حيط .. انشاله حتى يعملوا البحر طحينة أو مكرونة بالباشاميل .. لو حاجة مش عاجباك مش هاتمشي و لو انتي عايزة حاجة تتعمل حتى لو باقي الناس يبقوا الاسفلت اللي العربية هتمشي عليه عشان تجبيها .... هما الناس كدة .. هتقوليلهم معلش و سبيوني و بليز و كده مش هيحوا معاهم .. دول صنف ميجوش غير لما تضربيهم بالشوز

أنا.. لسه بستوعب الكلام و بدأت أفهمه .... و بصراحة عجبني أوي و من يوميها و أنا بنفذه بالحرف!